Berlîn de dezgehê  de kirmancan: Înstîtutê Ziwan û KulturêKirmancî-ÎKK- e. V. Berlin

Înstîtutê Ziwan û Kulturê Kirmancî (ÎKK), wo ke bi serran o paytextê Almanya Berlîn de xebat û xizmeta ziwan û kulturê kirmancan keno yew dezgeyê  de fermîyo û goreyê qanunanê Almanya ava bîyo.

Seba ke ziwan û kulturê xo rê xizmete bikerenê tayê roşnvîr û kedkarê kirmancî serra 1999 de bi tayê kirmancan, nas û dostanê xo û xo mîyan de kombîyayîşan virazenê. Nê kombîyayîşan de dezgeyê Înstîtut re qerar cêne û dest bi xebatê bingehenî kenê.

No dezgeh hetê tayê roşnvîr û kedkaranê kirmancan ra serra 2001 de ava bîyo. Nê roşnvîr û kedkarê kirmancê ke ava kerdîşê Înstîtutê Ziwan û Kulturê Kirmancî de ca gureto bi rêze nîyare: Çeko Kocadag, Fîgen Kocadag, Selahattîn, Munzur Çem, Aydin Bîngol, Daîmî Bektas, Hesen, Xidir  û Lerzan Jandîl.

Ava kerdîşê ÎKK ra na het yanê 18 serrî yo ke Înstîtut ava bîyo û xizmeta ziwan û kulturê kirmancan der o. Zê her serre oncîya emser Înstîtutê Ziwan û Kulturê Kirmancî kongreya xo ya 18. aşma gucîge 2019 de viraşte. Na kongre de komîteya rayeraberdişîya ÎKK ya newîye ame weçînitene. Nê hîre endamê ke seba  komîteya rayeraberdişîya ÎKK amayî weçîntene nêwe: Îbrahîm Beyaz, Cîhan û Wusênê Gestemerde wo. Na komîteya rayeraberdişî kî dest bi xebatê xo kerdo û wazena wareyê ziwan û kulturê kirmancan de xizmeta xo berdewam bikerone.                                       

Serra 2001 ra na het Înstîtutê Ziwan û Kulturê Kirmancî wareyê ziwan û kulturê kirmancan de zaf gamê hewlî êştî û îmzaya xo êşte binê zaf projayanê hewlan û nînan ra tayê xo nîyarê:

Serra 2002 de “Dêrsim 1937-38“ ser ro semînarê amê organîze kerdene.

Serra 2004 de “Rewşa  Ziwanê Kirmanckî ” ser ro konferans amê organîze kerdene.

Serra 2004 de “Şahîya Gaxanî” amê organîze kerdene.

Serra 2005 de “Xoverdayîşê Netewî yê 1925î” ser ro konferans amê organîze kerdene.

Serra 2005 de “Dêrsim: 1923 – 1938” ser ro konferans amê organîze kerdene.

Serra 2005 de “Destpêkerdîşê Seserra 20. ra Heta 1938 Dêrsim” ser ro konferans amê organîze kerdene.

 Serra 2006 de “Xoverdayîşê Qoçkîri-1921” ser ro konferans amê organîze kerdene.

Serra 2007 de “Musabeqaya Şîîr û Hêketanê Kirmanckî” amê organîze kerdene  (Jurîyê Musabeqaya Şîîr û Hêketanê Kirmanckî: Lerzan Jandîl, Îlhamî Sertkaya û Wusênê Gestemerde)

Serra 2007 de “Serrgêra 70. de Şewa Yadkerdişê Sey Rizayî“ amê organîze kerdene.

Serra 2010 de “Ewro û Meşte Kirmanckî “ ser ro konferans amê organîze kerdene.

Bi serran o ke bi nameyê Înstîtutî, Lerzan Jandîl kursê kirmanckî da û hona kî nê qursê kirmanckî dewam kenê.

Ancîya nê serranê peyenan de bi nameyê Înstîtutî Lerzan Jandîl û bi nameyê Yekmale kî Alan Dilpakî  ra pîya bi kirmanckî û almankî kî xêle kitabê domanan kerd hazir û vetî.

Serra 2013 ra na het Înstîtut “Şahîya Kulturê Kirmancan” Organîze keno.

ÎKK sey her serre emser kî ancîya panel û Şahîya Kulturê Kirmancan organîze kerde.

Şahîya Kulturê Kirmancan a 5. ke hetê komîteya Înstîtutî ra amebî organîzekerdene, hîrê rojî dewam kerd. Nê hîrê rojanê kulturî ra roja 16.11.2018 bi panelan dest kerd ci.

Destcikerdena nê panelî de Pîr Sey Riza serrgêra 81. de bi hurmet ame yadkerdene. O ra dime panelîstan sahne de cayê xo girewt û “Dêrsim 37-38” ser o hîra-hîra qese kerd.

Panelîstan mîyan de cigêrayox û nuştox Munzur Çem, sosyolog Îsmaîl Beşîkçî, cigêrayox û tarîxnas Mehmet Bayrak û Cahît Munzur bî. Serekê enstîtu, Lerzan Jandil, moderatorîye kerde.

Roja dîyine, 17.11.2018 de, konser estbî. Hunermendanê sey Beser Şahîn û Pinar û Îmam Ozgulî hunerê xo pêşkêşê meymanan kerd.

Roja hîrêyine, 18.11.2018 de, şahîye bi tîyatro dewam kerd. Kaybazê tîyatroyê kirmanckî Arêyê Kayî vejîyayî sahne û kayê xo kay kerdî.

Înstîtutî ancîya 17 adare 2019 de Gruba Areyê Kayî Silaynê Berlin

Gruba Areyê Kayî bi kayê xo yê newî “DIL” roja 17.03.2019 Berlin – Tîyatrom de vejîye sahne û kayê xo kay kerd.

No organîze kî hetê Înstîtutê Ziwan û Kulturê Kirmancan (IKK- Berlin), Cematê Dêrsimî – Berlin û Cemxane (Berlin Alevi Toplumu – Cemevi) ra amayî bî organîzekerdene.

Ma komîteya rayeraberdîşî ancîya wazeme emser bi endamanê Înstîtutê xo “Atolîya  Ziwanî“  virazîme.

Ancîya nê rojanê verê ma, Înstîtutê ma  bi Yekmale pîya Newroza domanan fîraznena.

Komîteya rayeraberdîşê ÎKK emser ancîya gorê qewet û îmkananê xo Şahîya Kulturê Kirmancan a 6. Organîze kena.

Berlin, 28.03.2019

Çime: Arşîvê Lerzan Jandîl ra

Cewab verde

Please enter your comment!
Please enter your name here