Na dinya nan û bext a

Evîn mebo gelek bedbext a

Omîd mebo çi bêbext o

Aya be nika wext o

(Zerdeşt BEDIRXAN)

Nameyê gerîlatîye: Karker Ciwanro

Name û peyname: Kawan Brahîm

Ca û dîrokê maya xo ra bîyayîşî: 1979 Silêmanî

Dîrokê tewrbîyayîşî: 1997

Dîrokê Şehadetî: 25ê Adare 2006, Deşta Şînê, Mûş

Nameyê gerîlatîye: Sîpan Sason

Name û peyname: Muzaffer Öndeş

      Ca û dîrokê maya xo ra bîyayîşî: 1981 Sason

      Dîrokê tewrbîyayîşî: 2001 Stenbol

       Ca û dîrokê şehîdbîyayîşî: 11ê Adare 2007 Pasûr, Amed

Nameyê gerîlatîye: Welat Xerza

Name û peyname: Musa Bostan

Ca û dîrokê maya xo ra bîyayîşî: 1975 Mereş

Dîrokê tewrbîyayîşî: 1999 / Êlih

Ca û dîrokê şehîdbîyayîşî: 19ê Gulane 2012 Heftanîn

Nameyê gerîlatîye: Xerza

Name û peyname: Şehmus Değirmenci

Ca û dîrokê maya xo ra bîyayîşî: 10 Mijdar 1980 Sason, Êlih

Dîrokê tewrbîyayîşî: 1996

Ca û dîrokê şehîdbîyayîşî: 5ê Êlule 2006, Hezo, Êlih

Nameyê gerîlatîye: Berxwedan

Name û peyname: Xalif Akbıyık

Ca û dîrokê maya xo ra bîyayîşî: 1982 Êlih

Dîrokê tewrbîyayîşî: 2001, Stenbol

Ca û dîrokê şehîdbîyayîşî: 5ê Êlule 2006 Hezo, Êlih

Sasonî de koyî estê, wexto ke ti temaşe kenî, koyî veng danê û vanê: “Wexto tenge de manenî, nêçar benî, bê ez tîya ya.” Bi awayêkê winayênî, waharê niştecayanê quntarên xo vejîyenê. Sey maya Star, verara xo akenê û vanê: “Bêrê bi hezaran serrî yo ez tîya ya; mi kultur, keramet û bîyayîşê şima pawit. Her ke şima serewedarna ez bîya êyê ke şima rê perê xo akerdî.” Koyan bi nê şêwazî vîrê kurdan de ca girewto. Verba dagirkerî, litoxkerî û spartina bêkerametî, merdimê ke nê deveran de cuyenî, tim û tim xo waharê hêz û xoverdayîşî dîyê. Semedo ke waharê Koyê Mereto yê.  

Herêma Sason koyan ra ameya pê. Bi koyan ra, waharê deştanê berhemdar a. Layê Sasonî û Zorê zî heman herême de yê. Koyan ra vejîyenî û heta Dîcleya nazdare herekîyenê. Gelîyanê Zorê, Xî û Sasonî na herême de yê. Nê gelîyî zî waharê taybetmendiyanê weyî kerdene û pawitena merdiman î. Karitene û ajaldarîye rê gelek destdaye yê.

Sason tarîxê Kurdîstanî de zî waharê cayêkê taybetî yo. Serdema împaratorîya Osmanîyan û serdema komara tirkî de zî hertim bi mîsyonêkê serewedartoxî werişto. Pêrokînê eşîrê herême, temsîla Kurdanê azad yê ke xo teslîm nêkerdê kenî. Kitabê Şerefnameyî ra zî ma zanî ke serewedaritişê kurdan verba Osmanîyan estbîyê. Çarika seserra vîstan de Eliyê Ûnis sere wedardayo û rayverîya xoverdayîşî girewta xo ser. Bi nê rastîyan ra pîya rastîyêka bîne zî esta ke sey kermê dare ya; na rastîye de kerm dare ra peyda beno. A rastîya ke sey takekes û sey eşîrete her dem mixenet a û serewedaritişî dir pîya bîye. Dagirkerî zaf bi asanî eşkenî êlan dûştê yewbînî de sûr kerê û bidê lejkerdene. 

Bi vejîyayîşê ser dikê tarîxî yê PKKyî ra PKK, eşka heme kayanê dişmenî yê serê Kurdîstanî pûç bikero. Bi nê awayî êdî Kurdîstan de xeta serewedaritîşî û mixenet-nokerî yewbînî ra amey cêserkerdene. Na zî bi gonîya fîraz a şehîdan bîye. Serranê 1980 de têkoşînê hemdemî Êlihê de reyê xo verdayî mîyanê komelî. 1980 ra nat têkoşînê azadîye êdî vereraye-şêwaz bedilna û xo resna asta gerîlatîye. 

A roje ra nat heta roja ma ya ewro Koyê Sasonî de gerîlayî kêm nêbîyê. Pêrodayîşan ra dima Sasonî û çorşmeyê Koyê Meretoyî de gelek xoverdayîş ameyo ciwîyayene. Coka deyîra serê Şehîdanê Sasonî bi namekerdîşê Koyê Sasonî dest pêkena.   

Ez zî yew şopdarê tarîxê nêzdî û dûrî yê nê rastîyan, serra 2005 de şîya Sason. Şîya hetê embazanê xo yê ke hewna ma yewbînî nêşinasnenî. Şîyayîşê min ê herêma Sasonî, şîyayîşêko semedê mendîşî nêbi. Ez seba caardişê wezîfeyek uca bîya. Çend rojê ma yê destpêke bi şinasnayîşê yewbînî ravêrayî. Mi embaz Karker Ciwanro, Berxwedan û Welat Xerza uca şînasnayî.  

Embaz Karker Ciwanro, Başûrê Kurdistanî paytexta roşnvîrîye, Silêmanîyeya rengîne ra bi. Aya ke tayê hêzê kurdî bi serran o wazenê bikerê paytextê mixenetî. Embaz Karker Soran bi. Vera xeta mixenetî ya ke Başûrê Welatê mi yena sepandene, embaz Karker weriştbi û amebi tewrê gerîla bibi. Başûrê Welatî ra dagîrkerî ameybî qewirnayene, labelê qewirnayîşê dişmenî ra dima komel azad nêbibi. Komel bindestê dişmenî ra vejîyabi kewtbi binê destê tayê axa, şêx û keyeyê derebegan: yan zî çîna corêne a kurdan. Semedê nê  embaz Karker têkoşînê azadîye ya rastikîne mîyanê PKKyî de vîneno û tewrê gerîla beno. Koyanê berzan ê biheybetan de ma yewbînî şinasnayî. Semedo ke ruhê ey asî bi û waşteka ci ya azadîye estbî embaz Karker deşta ke mixenetî serê şarê ma de yena spartene ra weriştbi û amebi koyê berzî. Embaz Karker tim û tim bicoş bi. Keda ci ya bêpeynîye estbî. Di şert û şurtanê zehmetan de zî eşkayêne yarenîye bikero û embazê çorşmeyê xo bido wiyayene. Yeno vatene: “Di lej de wîyayîş dîyardeya tewr cidî ya.” Embaz Karker zî goreyê na rastîye têw geyrayêne. 

Herêma Sasonî, serra hezar û newsey û neway û new de xo peyserantişê gerîlayan ra dima veng bîbî. Fermandarîya qada mîyanêne ya ke navenda xo Amed de ya, serra di hezar û çar de erkê newe ra şîyayîşê herêma Sasonî dabi embaz Karker, Welat û Berxwedanî. Girewtişê nê erkî; ne normal û rêze ra bi. Semedê caardişê nê erkî nê her hîrê embazî, Welat, Karker û Berxwedan zerrî ra û bi waştekêka girde şinê.

Embaz Karker mîyanê şarê qada mîyanêne de embazanê bînan ra vêşêr ame heskerdene. Semedo ke şarê Amedî waharê vîyarteya birîmetin o, şarî qandê embaz Karkerî vatêne: “Cayêko dûrî ra ameyo û tîya de qandê ma lej keno.” Coka her kesî ra vêşêr qedir û qîmetê xo hetê şarê welatperwerî de estbi. Embaz Karker wexto ke qada mîyanêne de mendbi, dormarê şaristanê Amedî de, ziwandê tirkî musaybi. Labelê tirkîya xo sey tirkîya Amedîja şikite biye. Embaz Karker erd û şarê Vakurê Kurdîstanî rê amebi bestene. Coka embaz Karkerî nêwaşt Vakurê Kurdistan ra şiro cayêdo bîn. Embazan û şarî zî qîmet da embaz Karkerî. O girewt ser doşa xo û cayêko taybet da ci. 

Embaz Berxwedan eslê xo qezaya Sasonî eşîreta Bekirîyan ra bi. Na eşîre herême de, manaya welatperwerî û xoverrodayîşî de namdar a û waharê vîyarteyêdê rind a. Aîleya embaz Berxwedanî hewna temenêko qijkek de wazenî ey bizewicnê. Rojê venga ci danê û vanê: “Ma do to bi na kêneke bizewicnê.” Kêneka ke qala ci yeno kerdene, embaza Berxwedan ya qeçekî û kayan a. Coka embaz Berxwedan bermeno û vano: “Na kêneke sey waya min a û nêbeno ke ez aye dir bizewica. Bi no hewa embaz Berxwedan hem vernîya zewaca embaza xo ya kayî geno, hem zî vernîya zewaca temenê qijkekî de geno. Xora embaz Berxwedan nê serran de fikir keno ke tewrê refanê PKKyî bibo. Di Temenê tewr dest û pa de û wêrekî de embaz Berxwedan beno gerîla. Dima wextêko kilm şi herêma ke maya xo ra bîyo. Çunke herême de pêwîstî bi kadroyê xocayî estbi. Embaz Berxwedan zî hem seba ke gema Sasonî nas kerdenê, hem zî şarê welatperwerî û dostan şinasnayene bibi hetkar. Embaz Berxwedan merdimê xo zî kerdibî xizmeta gerîlayan ke gerîla vera dişmenê şarî yê tarîxî rindêr lej bikero. Embaz Berxwedan xo goreyê rastîya PKKyî û cuya şorişgêrî awan kerdibi. Hêza xo ya laşî û praktîkî zî estbiye. Çi kar ame vernîya ey xo ci ra nêda pey. Coka yewîtîya hêza laşe û  ya zerrîya wêreke saz kerdebî.       

Welat şarçeya Pazarcix a Gumgumî ra yo. Netîceyê asîmîlasyon û înkarkerdişê kulturî, embaz Welat nêşeno şarçeya Pazarcixe de hereketa azadîye bişinasno. Embaz Welat Xerza, encamê sîyasetê erdê xo ra dûrvistişê şarî ya dewleta gonîwere de, Pazarcixe ra şino qada Ewropa. Welat encax Ewropa de eşkeno rastîyanê Kurdîstanî bivîno. PKKyî zî şarê kurdî ver bi kotî ameyo koçkerdene, verê xo dayo uca û asîmîlasyon dayo vindertene. Rayber Apoyî wexto ke koçberîya şarî ver bi Ewropa dest pêkerde, kadroyê PKKyî ver bi Ewropa ruşnayî. Embaz Welat zî serranê newayan de Ewropa de hereketê azadîye şinasneno û badê cû tewrê refanê PKKyî beno. Dima tewrbîyayîşî, Ewropa de embaz Welat na fine bi zanayîş û pêresayîşêdê gird û fîrazî yeno Welatê xo. Seba ke Kurdîstanî azad bikero, beno gerîla. Beno gerîlayê azadîya Kurdîstanî. 

Mi herêma Sasonî de Embaz Welat nas kerd. Wexto ma reya yewine kîşta yewbînî de roniştî, hewna vîsta destpêke de dîyar bî ke embaz Welat heta vajî Embazêde zerrîpak o. Bi şêweyêkê xozayî temaşeyê cuye kerdêne. Çî senî bo winî zî temaşeyê ci kerdêne. Berjewendîyanê şexsîyan nêfikirîyayêne, tim û tim berjewendîyê pêroyî esas girewtêne. Semedo ke wezîfeyê rayîrzanî (kurye) de ca girewtibi, êdî waştêne mîyanê lejê germî de ca bigîro. Coka amebi herêma Sasonî. Embaz Welat bi tena xo şibi qezaya Hezoye û çalakîya canfîdayî kerdibi. Bi tena xo gale berdibi serê cayê qaymeqamtî û polîsan ser o. 

Vîrameyîşêkê embaz Welatî, qada mîyanêne de vila bibi. Vîrameyîş wina bi: Embaz Welat wexto ke rayîrzanî keno, komêka embazan qada mîyanêne ra beno qada Botanî. Wexto herêma Farqînî ra ravêrenê; seba embazî awêka serdine ya hênî bişimê, ser hênî de vindenê. Na vîste de embaz Welat çenteyê xo ra tozê şerbete vejeno ke dekero mîyanê awa serdine û bido embazanê xo. Embaz Welat tozê şerbete dest de wexto ver bi hênî şino wina vano: “Haydî arkadaşlar îçelîm aşkin şarabini.” Kome de embazê cinî zî estê. No semed ra , gerîlayê camêrdî şermayenê. Vîstêk dima embaz Welat bi xo hesîyeno ke uslûb de şaşîye kerda. Gerîlayan mîyan de wexto tena camêrdî kîşta yewbînî de bê hetê uslûbî de baldarbîyayîş kêm o. Wexto embazê cinî û camêrdî cayêk de têmîyan bê, ganî hetê yarenîye û qiseyan de bi baldarî têw bigeyrê. Eger wina nêbo hereket û qiseyî ne ca de bê, merdim beno babeta yarenîye ya gerîlayan.

Ma Sasonî de wextêk mendî û peyra, di embazê bînî ameyî ma het, tewrê qefleya ma bîyî. Nê her di embazî zî eslê xo de embazê herême bî. Nînan ra embaz Sîpan dewa Hêlîne ra bi. Embaz Xerza zî êleka namdare, êla Mele Evdirehman, êla Timoqî ra bi. Embaz Sîpan sey virsik bi. Wexto ke biameyêne waştene kewtêne hereketî mîyan û tengeyî xo ver ra wedardayêne. Embaz Sîpan rastî zî Qehreman bi. 

Qehremanbîyayîş namekerdişêko rêze ra nîyo, ganî her kesî ra nêro vatene. Qehreman nê yê: êyê ke mezg, zerre û hêza laşa xo kenê yew ê. Ganî hetê fikrî ra saxlem bê, yan zî welatperwer, şorişgêrê pêtî bê. Waharê zerrîyêka wêrek û bêterse bê. Vera dişmenî çiqas bi kîn û nefret bê, vera şarî zî hende waharê heskerdiş û rêzdarîye bê. Ganî beden û qama lehengekî/e her çîyî ra ver waharê heybetêk bo. Asta hêza xo sey Rustemê Zalî bo. Xora qehremanîye her kesî ra peyda nêbana. Embaz Sîpan waharê nê taybetmendîyan bi û her çi hedef ci ra ameyo mojnayene bê şik û gûman hema ca de serê hedef û armancî de şi. Awirê Embaz Sîpanî de germahîyêk ameyêne hîskerdene. Lewê ey tim û tim nêmpeşmerîyaye bî. Ne tam peşmerîyayêne ne zî tam rîtirş bi. Mabênê her dîyan de vinderte mendêne. Coka kes ci ra aciz nêbîyêne. Xora ey zî qet embazê çorşmeyê xo xo ra aciz nêkerdêne. Coka embazan tim waştêne çorşmeyê embaz Sîpanî de bimanê. Sîpan kesayetêko zaf sade bi. Sey Koyê Sîpanê Xelatî biheybet bi. Demo ke o sadebîyîş û heybet  ameyêne têhet, ci ra Qehremanêk peyda bîyêne. 

Keye û merdimê embaz Xerzayî zî welatperwer ê. Keyeyêko winasî ra ameyo mîyanê qefleyanê gerîlayan. Xerza, Başûrê Kurdîstan û Wareyanê Colemêrgî de mendibi. Waharê ezmunê ciwîyayîşê gerîlatîye bi. Bi ameyîşê serê erdê bapîr û dapîrî de gelek zerrîweş bibi. Têkîlîyanê xo yê komelî de aver bi. Coka bi welatperwerê ke dewan de manenî reyde zaf rew embaztî aver viste.  

Nê bî hemrayîrê ke ma pîya herêma Sasonî de pratîk kerd. Pratîka ma dolimna bi xîntîya gerîla ravêrê. Xîntîya gerîla zî wina ya: çîyê ke mezg û fikirê kesî ra nêravêrenê gerîlayî kenê. Coka cuya gerîla normal nîya. Mîyanê pratîkê winasî de rojêk ma Gomika de bî. Gomika ra ma do bêrê Golavê. Mabênî de rayîra ke Êlihe ra yena Sasonî esta. Rayîra ma ser o tayn girdî estê ke nêzdîyê rayîra ke Êlihe ra yena yê. Nê giran ser de cerdewanî ameyê bicakerdene. Hewcedarîya ma zî bi şinasnayîşa rayîrê şîyayîş û ameyîşî yê neweyî estbî. Rayîro ke ma her tim ser ra şonî û yenî tayn dûr bi û zaf çivdayenî estbî. Ganî ma rayîrêkê neweyî keşif bikerê. 

Şan de awanşîyayîşê tîje ra pey ma kewtî rayîr ser o ke şirê Golavê. Ma her tim nê rayîrî bikar ardêne. A vîste de mi embazan ra va: 

-Gelo ma nêşenî cayêkê neweyî ra şîrê? 

Embazê Berxwedan û Sîpanî çimanê yewbînî ra ewnîyayî û dima Sîpanî va: 

-Hevalê Azad ti zanî. 

Xora ez zana Sîpan do cewabêko winasî bido. Peyê cewabdayîşê Sîpanî ra mi va: 

-Ma rayîrê kîşta girdo ke cerdewanî ser de yê ra şirê. 

Sîpanî ca de va: 

-Ma eşkenê şirê. 

Dima mi va: 

-Embaz ma semedê şîyayîşî no rayîr tersnak nîyo?

Sîpanî va: 

-Ya. 

Seba şîyayîşê Koyê Golave rayîr zaf nêzdî bi labelê qandê ma rayîr zaf xeternak bi. Vîstêk ma fikirîyayî û dima ma bire daye ke na xeta neweye biceribnî ke şîyayîş û ameyîşê ma rê bena yan nêbena. Ma goreyê naye bi lez bername viraşt, dima kewtî rayîr ser o. Ma wexto ameyî duştê girdo ke cerdewanî ser o yê, rayîr bi rayîrê maşîneyan. Pîyarê qedîya. Heman vîste de vengê cerdewanan serê girdî ra weş ame goşanê ma. Cerdewanî cor de ma zî cêr de yê. Rayîro ke ma ser ra şinê, cayêk ra dima her di hetan ra bi baxçe. Eke cerdewanî ma bivînê û qerşun berzê, zaf asan şenê ma bîyarê war ro. Xora tu cayo ke ma bişayê vazdê û xo raxelisnê çin bi. Ma bi gamanê lez şî û xo binê hakîmîyetê girdî ra vet. Êdî ma zana ke ma şaşîye kerda la pey de ageyrayîş zî nêbîyêne. Bi lez û vaz ma xo resna rayîro qîr o ke şino Sasonî. Semedo ke vernîya ma de dewe û çorşmeyê rayîrî de zî banî estbî ma bi resayîşê rayîrî ra reyna şas mendî. Ma ne dewe şinasnenî, ne zî zanî cerdewan tede estî yan nê. Ma nêzanî dewe welatperwer û dost a, yan nê. Zêde derfetê ma yê serê rewşe de fikirîyene û galgalekerdişî çin bi. Coka ma xo da mîyanê banan û dima ma kewtî mîyanê baxçeyanê dewe. Ser çîtanê baxçeyan de vîyartiş zehmetêr o. Ma ge çep ra ge rast ra şî. Ma heta ke baxçe nêravêrna û mîyanê dewe û baxçeyan ra nêvejîyay, nêvindertî. Ma badê cû da kaşê girdî, tayn şî û restî cayêkê seveknayeyî. Ma xo tada peyê xo û rayîro ke ser ra ameyî temaşe kerd. Sîpanî çimê xo verdayî çimanê mi û va: 

-Ma êdî tîya ra nêşinê. Naya ke ma kerde ne çîyêka rêze ra bîye, şaşîyêka girde bîye. Eke dişmen bidîyêne şayênê ma şehîd bikero. 

Ma a roje ra tepîya Koyê Golave ra çerexîyayî. Gema ke ma tede bî ma nêşkayêne biroje hereket bikerê. Çunke dişmenî verê geme de qereqolî naybî ro. Ma biroje zîyadêrî cayê xo de mendêne, heta ke nêbîyêne şan hereket nêkerdêne. Rojêk tayê dewijî ameyî ma het û roniştî. Dimayê vîstek bi şinasnayîşa yewbînî ra, ma pêresayî ke dewijî welatperwer ê û rew ra yo embazan şinasnenî. Dewijan ma rê qala serranê 1993 kerd û cuyayîşê embazan ser o vîrardeyê xo vatî. O taw embazî bi humarêko zêde herême de mendêne. 

Mîyanê roje de zîyadêrî ma sersîya daran de roniştêne û galgale kerdêne. Qiseykerdişê ma zî zîyadêrî serê cuye û çalakîyan de bî. Qandê cû têwgêrayîşê dişmenî zaf girîng bî. Embazê ke verî ra herême de bî gerre kerdêne û vatêne: “Hedefêko destdaye çin o ke ma çalakîyêka bitesîre bikerê”. Semedê na zihîfîye ma galgala xo hera û gur kerdêne. Ma sernî de heme sazgehanê dewlete verê çiman ra vêrnayî. Ma peynîye de famkerd ke tayê cayê ke sazgehê dewlete tede yê, çi leşkerî bê, çi zî sîyasî, hîna nêşinasnayêne. Na rewşe rind nêbîye. Ma bire daye, cayê ke nêşinasnenî, ganî ma şirî têbigêrê û nas bikerê. Peynîya galgaleya ke ma bi rojan ramit de, tayê çî-mî zelal bîyî. Êdî ma fam kerdibi ke ganî ma lezkanî hedefanê newe û destdayeyan bişinasnê. Ganî hedefê ke estê baş bêrê keşifkerdene. Keşifkerdişê hedefî de feraseta sereke ganî na bo; keşifkerdişî ra pey plan bêro viraştene.

Peynî de ma galgala xo resna bername. Naye ser Karker, Sîpan û Berxwedan şî qezaya Sasonî ke keşif bikerê. Peynîya na xebate de, embazan geme û qezaya Sasonî baş şinasnayî. Gama erka Karker, Sîpan û Berxwedanî qedîye ê ameyî ma het. Ma pêro pîya babete ser fikirîyayêne. Peynî de nê her hîrê embazî semedo ke çalakîye virazê madeyên teqemenî amade kerdî û verê xo da cayê çalakîye.

Yeno zanayene, serra 2000an û dima peyderpey metodê gerîlatîye bedilîyayî. Ma ronayîşê artêşa pispore ra fek vera da. Awankerdîşê dewleta Kurdî ca verda. Hêzê pawitişî aver vistî. Na zî tena pawitişê rewayî yê xo û komelî esas gena. Coka metodê komanê gerîlatîye ame vurnayene. Goreyê naye zî yewîneyê ke hûmara înan a zaf a ra zîyadêrî yewîneyê ke senînîya înan hewl a pêwîst bî. Peynîya nê ferasetî de bi taybetî herêmê ke dişmen tede zal o, komê gerîlayî hîrê ra heta panc kesî nêravêrayêne. Ma zî pêro pîya şeş embaz bîyî. Hîrê embazî semedê çalakîye şîbî. Ma hîrê embazê bînî zî semedê karêdê bînî cayêk de mendî. Mîyanê roje de ma binê kemerêka pane de adir wekerdbi. Kemere ke bîye germ mîro ke ma alawitbi ma pewt. Mîro ke ma amade kerdbi, girêk bi girêk akerdêne û serê kemerî de pewtêne. Çunke ma komêka werdîkeke bîyî, ma nêeşkayêne sêlêk xo dir bigêyrênê. Coka ma neçar bî serê tenekeyêk, yan zî serê kemerêka pane de nanê xo bipewcê. Mîyanê roje de ma bi nê karan mijûl bîyêne. Vîstêk nuqtaya ma ser ra helîkopterêk zaf bi nizmî pera û şi. Dima çend vîstanê bînan helîkopterêdo bîn zî serê ma ra pera û ver bi Sasonî şi. Ma di embazan nan pewtêne, embazê ma yê bînî, embaz Xerzayî, cayêdê berzî de çorşmeyê ma kontrol kerdêne, ka çîyê esto yan nê. Heman wextî de embaz Xerzayî bêsîme zî goşdar kerdêne. Bi vîyartîşê helîkopterê dîyinî ra embaz Xerza ame kîşta ma û va: 

-Embazan çalakîye viraşte. 

Nê vateyanê embaz Xerzayî ma dir kelecanêdo gird viraşt. Ma bi kelecan o goşdarî kerd. Dîyar bî ke çalakîya ke embaz Karkerî zaf waştêne bikero kerdbî. Embaz Xerzayî qiseyê xo dewam kerdî û va: 

-Dişmenî bêsîme de va: “Bê dedektor meşorê cayê çalakîye. Eke dedektor çin bo, cerdevanêk biruşnê cayê çalakîye. 

Ma serê nê qiseyanê dişmenî heman vîste de galgale kerd û mi va: 

-Erjê qorucîyan dişmenî het de bi qasê yew dedektorî yo. 

Embazan teqemenîya ke xo dir berdebî, yew cayo ke dişmenî qet şik nêberdêne ser de  bi ca kerdebî. Embazî xo resnenê binê tabûra Sasonî û rayîro ke binê tabûre ra ravêreno de teqemenîye bi ca kenê. Dima yenê duştê cayo ke mayîn nayo ro uca de vindenê. Uca girêk esto serê ey girî de vindenê ke tawo ke dişmên vêrd ra mayînî biteqnê. Rayîr embazan ra rind nêaseno la embazî naye rê zî çare vînenê. Cayo ke mayîn nayo ro uca de goreyo ke bîvînê îşaretêk nanê ro. Vîsta ke paweyê ci yê yena. A vîsta bi heyecanî. Maşîneya leşkeran tabûre ra vejîyena ver bi mayînî yena. Demo maşîna Reo derbaz bena ke pancês leşkeran gêna, embazî tena banê maşîneyî vînenê û demo maşîne yena verê mayînî, embaz Karker engişta xo ya fîraze nano serê bişkoka (tûş) bêsîme û bûm. Maşîne mîyanê dûmanêkê sîyayî de vindî bena. Embazî bi coşa çalakîye kewenê rayîrî ser û yenê. 

Ma hetêk ra nan pewtêne, hetê bînî ra zî, qandê şan de ca bivurnê amadekarî kerdêne. Xaftila her hîrê embazê çalakîkerî ameyî hetê ma de vecîyayî. Ma zî hal û hewalê înan pers kerd û peyra mi Karkerî ra va: 

-Şima senî zana ma tîya der î?

Karkerî zî cewab da û va: 

-Ma tîya ra derbaz bîyêne ke xo cayê çalakîye ra dûrî bidê. Demo boya nanê germî ameye, ma zî verê xo da tîya. Ma zanayêne ke şima yê û nan pewjenê. 

Mi na xoşebere ra pey nano germ o fîraz yê dayîka Star da embazan ke biwerê. Embazan nano germ werd, awêka serdine zî serê nanê germî ra şimite. Grûba ma badê cû giran-giran kewte rayîrî ser û şîye. 

Xerzayî roja bîne bi bêsîmê girdî tekmîl da fermandarîya eyalete û va: ´Ma çalakîye de di leşkerî kiştî´. Ma encamê çalakîye nêzanê. Dişmenî no reqem serê bêsîmî ra dabi. Ma wextê ra dima zanayîş girewt. Na çalakîye de hîrês leşkerî merdîbî û di zî bîbî dirbetin. Na çalakîye dişmen hejna, bawerî da şarê ma yê welatperwerî. 

Embaz Karker serra 2006’an de herêma Başûrê Mûşî de menga Adare de bi hîrês embazanê xo yê bînan ra şehîd kewt. 

Embaz Berxwedan û Xerza waştêne şirê Êlih çalakîye virazê. Qandê cû esparê maşîneyêk benê. Labelê ramitox xayîn, yanî sîxûrê MÎTî yo. Ramitox ma û waya xo, ke nameyê ci Mizgîn a xo dir ano. Embazan waştbî bi dîmenê yew aîleyî şirê Êlih. Embazî bawerî bi ramitoxî anê. Coka her di embazî çekê xo kenê bagajê maşîne. Maşîne dewe ra ver bi şaristanî şona. Raye ser o qereqolê dişmenî esto, demo embazî resenê qereqolî vînenî ke dorûverê înan bi leşkeran ameyo dorpêçkerdene. Hema a vîste de embaz Xerza sîleyêk şatika ramitoxê xayînî dano. Labelê êdî berey o. Ramitox raste-rast xo maşîne ra erzeno tever. Heman vîste de dişmen dest bi qerşun varane keno. Peynî de Xerza û Berxwedan şehîd kewenê. Mizgîna qijkeke netîceyê bextreşîya birayê xo de ya ke vera embazan kerda de cuya xo dest dana. Marda ramitoxê xayînî zî bena dirbetine. Peynîya şaşîya embazan a metodî de, di embazê Qehremanî bi awayêkê nêmerdaneyî yenê şehîdkerdene. Embazî eşkayêne bi payan şirê Êlih, eke bi peyatîye bişîyêne xayîntîya ke sey xencerî paşta şarê Kurdî de ya nêbîyêne sebebê nê di embazanê qehremanan.

Embaz Sîpan, kampa zimistanêkê serdin û seqamî de herêma Dorşîne de bi qerşunanê xayînêk bi şeş embazanê xo yê bînan şehîd kewt. 

Embaz Welat Heftanîn de çalekîyêk de tawo ke galê dişmenî kerd, bi şehîdo bêmerg.

Nê embazî şehîd bî. O ke sax mendo ezo. Barê nê şehîdan zî mendo paştîya min ser o. Heman demî de qala nê şehîdan kerdiş erkêko wijdanî û exlaqî yo. Eke ez eşkaya tayn bo zî, nê embazan binusa, ez o bextewar biba. 

Hemrayîr û şehîdê birîmetî Karker Ciwanro, Sîpan, Berxwedan, Welat, Xerza! Ha yo Vakur de têkoşîn aver şino, Rojawan azad beno, embazê şima nika derûdorê deşta Mûsilî de herinda lej û qehremanîya Derwêşê Evdî de mil dayo yewbînî û têkoşîn kenê. Rojhelat bêvengîya verê teqîne cuyeno. Embaz Karker nika şaristano ke ti tede maya xo ra bîyê, hema zî vengo mixenet yeno heşnayene la bi saya hezaran şehîdanê sey to êdî mixenetî û merezîya Kurdistanî ameya bêtesîrkerdene. Feraseta serwer a Kurdistanî feraseta azadî û cuya demokratîk a.

Bi saya ked û ereqê çareyê şima û gonîya şima ya fîraze, Rojhelato Mîyanên de şarî yenê têhet. Desthilatdar her demî ra zîyadêrî bifikar ê. Seranserê Kurdistanî ra vengê azadîye yeno heşnayene. Deyîra ma ya nêqedîyayîye bi beşdarbîyîşê hezaran kênek û xortanê şaran berdewam a, embazîno! Cuye do sosyalîst û kominalîst bo, bi saya hezaran ê sey şima.

2015, Xinêre, Kurdîstan

Cewab verde

Please enter your comment!
Please enter your name here