Hedîseyê Kobanê û weçînayîş

Mamoste Silêman

Nê rojan de Serekkomar Recep Tayyîp Erdogan,  Selahattîn Demirtaşî hedîseyanê Kobanê de, bi talîmat qetilkerdişê 53 tenan ra sucdar keno û bi cezaya îdamî ey tehdît keno. No feraset ra yew çîyo rind nêvejîyeno. Tena qaos vejîyeno.

Serekkomar Recep Tayyîp Erdogan mîtînga xo ya Kocaelî de, wexto ke behsê Selahattîn Demîrtaşî keno, qelabalix silogananê ‘îdamî’ fîneno. Na ser o Erdogan vano ke “Eke Meclîsê Tirkîya, derheqê înan (Selahattîn Demîrtaş û wekîlanê HDPyî) de qerarê îdamî mi rê raybikerdêne, mi no qerar rewna eya (onay) kerdbi.”

Selahattîn Demîrtaş zî vera nê vatişê Serekkomar Recep Tayyîp Erdoganî bi Twîtterî, nê mesajê rayaumûmîye rê bar (par) keno. Vano ke “Hedîseyê Kobanê; 7ê Teşrîna verêne de, wexto ke Erdogan vano ke ‘Kobanê keweno, ha kewtiş de yo’ dest pêkenê.” Yanî nê hedîseyî, vatişê Erdoganî dima dest pêkenê.

Dima zî wina vano: “Derheqê Hedîseyanê Kobanê de, ne mi rê, ne zî îdarekeranî HDPyî rê tek yew dewa zî nêabîya. Birêz Demîrtaş yewna Twîtterê xo de wina vano: “Hedîseyanê Kobanê de hûmara merdimê ke qetil bîyê 53 nîyî, 43 yî. Înan ra 6 tenî merdimê HUDAPARî yî. Bê dewaya nê 6 merdimanê HUDAPARî, yewerî rê tek yew dewa yan persîyarî nêabîya. Hedîseyanê Kobanê dima, 5 aşman mîyan de, Erdogan û AKP reyra seba Prosesê Çareserîye, pêvînayîşê ma dewam kerdê. Nika zî ma se terorîst îlan keno. Erdogan vano ke ‘Eke ez Serekkomar biba, ez to îdam kena.’ Serra 2018î de yew namzedê Serekkomarîye, weçînayoxanê xo rê îdam wead keno. Ey Erdogan, goya bi Twîtterê mi, 53 hîrê merdimî qetil bîyê. Eke wina tewir yew Twîtterê mi, ti bar bikî, ez soz dana ke seba to, hetan 24ê Hezîrane ez namzedîya xo ya Serekkomarîye ra fek veradana.”

Ez wazena ke nê dîyalogî ser o fikrê xo bîyara ziwan. Aye yewin; Serekkomar Erdogan, çirê nê hedîseyanê Kobanê, bitaybetî çirê kiştişê Yasîn Boruyî ano ziwan? Yasîn Boru tede, seba 6 merdimanê HUDAPARî dewa abîya. Di hebî polîs û di hebî sûrîyeyîjî tede derheqê qetlîamê 37 tenan de çirê dewa nêabîya? Mesela qatilê 33 HDPyîyan kam o/î? Serekkomar Tayyîp Erdogan behsê Yasîn Boruyî keno, la behsê qetilkerdişê 33 HDPyîyan nêkeno. Ne ma, ne zî Selahattîn Demîrtaş merdişê nê merdiman waştnî. Selahattîn Demîrtaşî Komela Heqanê Merdiman de epey wext serekey kerda. Semedo ke gonîya ciwananê kurdan û tirkan billa nêbo, bi zerrîya safî yew têkoşîn dayo. Şima Selahattîn Demîrtaşî se terorîstî îlan kenê, la di ray xelata aştîye girewta, yewna ray zî se lîderê dinya yê yewin ameyo weçînayîş. Selahattîn Demîrtaş seba ke merdimî bêrê kiştiş, Twîtter de esla yew talîmat nêdano. Epey yew wext serekîya HDPyî kerda. Beno ke merkezê HDPyî seba yew têkoşîno demokratîke, yew talîmat teşkîlatê HDP û rayaumûmîye rê ray biko. Rayaumûmîye ya demokratîke wazena ke Selahattîn Demîrtaş derhal zîndan ra serbest verradîyo. Selahattîn Demîrtaşî yewer teşvîqê şîddetî nêkerdo. Hetan eyro tena fikrê xo ardo ziwan û têkoşînê demokratîke esas girewto.

Semedo ke Selahattîn Demîrtaş bibo namzedê Serekomarîye, muracatê Heyetê Weçînayîşî yê Berzî û Wezaretê Edaletî kerdo. Hem Heyetê Weçînayîşî yê Berzî û hem zî Wezaretê Edaletî, namzedeya ey, eya kerda. Serekkomar Erdogan Selahattîn Demîrtaşî serekeya terorîstey ra sucdar keno û bi îdamî tehdît keno. Goreyê ma no vatiş hewa ra maneno. Aseno ke no feraset de menfîeto sîyasî esto. Na çamure, seba rayan fîynîyêna. Selahattîn Demîrtaş, zîndan de yo, dest û lingê ey beste yê. Vera nê vatişan de nişno xo bipawo. La heme dinya zana ke Selahattîn Demîrtaşî aştî û demokrasî ra, heq û huqûqî ra vêşêr yewna çî nêwaşto.

Çi heyf ke Recep Tayyîp Erdogan, semedo ke nîjadperestanê Tirkîya ra rayan bigêro, yew het ra polîtîkaya şîddetî de israr keno, yewna het ra zî Selahattîn Demîrtaşî serekê terorîstey ra sucdar keno û bi îdamî tehdît keno. No dewr de, na polîtîka û nê uslûbî hinê îflas kerdo, tikê zor bazar veyneno.

Cewab verde

Please enter your comment!
Please enter your name here