Metodo qilêrin; weçînayîş

Azad Ararat

Nê rojan de rojdeme ancî bîyo weçînayîş. Iraqî de weçînayîş ame kerdene. Do Tirkîya de weçînayîş bêro kerdene. Çend serran ra pey her welatî de weçînayîş yeno kerdiş. Çik o weçînayîş? Bi rastî zî metodêko demokratîk o? Bêgûman ney. Weçînayîş metodêko demokratîk nîyo. Ganî demokratîk bo la demokratîk nîyo. Çunke sîstemê dewletan mîyan de vurnayîşê îqtîdarî bi weçînayîşî reyde nêbeno. Îqtîdarî bi şer yenê vurnayene. Sîyaset badê şerî keweno dewre. Rengê sîyasetî şer de dîyar beno. Fina hêzanê girdî yê dinyayê her cayê dinyayê de eke dest ra bêro mudaxele weçînayîşê dewletan kenê.

Weçînayîş metodêko demokratîk nîyo. Yew kaya destê îqtîdarî de ya. Seba ke îqtîdar xo meşrû bikero weçînayîş yeno kerdene. Zaf yeno vatene ke weçînayîşî de îrade şar vejîyeno raste. Labelê heme çî verê ra yeno dîzayn kerdene û badê weçînayîş yeno kerdene. Qandê cû weçînayîş nêbeno îrade mojnayîşê şarî. Beno yew kaya ser dika tîyatro.

Eke weçînayîşî demokratîk bê. Îradeyê şêligan bivejo raste, o wext nê îqtîdarê ke nika hikum kenê yew zî îqtîdarî ser o nêmanenê. Sere de Tirkîya û dewletanê sey Îran, Iraq, Surîye û yê bîn yê Rojhelato Mîyanên yew zî bi metodêko demokratîk nêyenê weçînayîş. Eke metod demokratîk bo nê dewletan de mîyanê çend rojî de yew îqtîdar zî ser hikum de nêmaneno.

Sermaye, sîyaset, burokrasî, leşkerî winî xo rêxistin kerdê, nêverdanê kes rehetî bicuyo. Nêverdanê kesî waştenanê xo reyde têkoşîn bikerê. Sey her çîyî weçînayîş zî bîyo babetê bazarî. Weçînayî ser o zaf bazarî benê. Naye rê nimuneyo tewr balkêş zî weçînayîşê Tirkîya yê. Dîyarkerdişê roja weçînayîşî ra heta qanun ronayîş xeylê çî bi peynîya bazaran de yeno kerdene. Nameyê ci zî beno xomojnayîşê îrada şarî. Bi no hewa mezgê şarî ser o kayî yenê kerdene.

Weçînayîşan de zaf mesref zî beno. No mesref tunika komelî ra vejîyeno. Peynîye de sîyasetmedarî ney şar beno perîşan. Weçînayîşan de mesrefê burokrasî û yê mitîngan tay nîyo. Fina reklam yeno kerdene ke hemeyê ci mesrefêko ne lazim o. Pankart, afîş, flama çî-mî yenê viraştene ke mesrefê nînan zî tay nîyo. Badê weçînayîşî raste de çopêko nêyeno pak kerdene maneno.

Naye rê çare çik o? Çare awan kerdişê alternatîfan o. Seke Nîtçe vano beno ke merdimê berzî nê derdî rê bibê çare. Merdimê berzî rayberîye bikerê û komelî îdare bikerê. Çareyêko bîn dîyarkerdişê temsîlkaran o. Her kom, taxe eke xo bi xo temsîlkaranê xo weçîno û temsîlkarî bêrê têhet û îdareyê demkî ronê, beno ke bibo yew çare. Serrê reyêk dîyar kerdişê temsîlkaran zî yew rayîr a. Temsîlkarê ke karê xo baş nêkenê, nînan wezîfe ra girewtiş zî yew metodo. Şaristan, herêm û welatî de pare kerdişê wezîfeyan zî yew çareyêko baş o. Eke hêzê sîyasî partî û şexsan dest de nêro pêser îqtîdar zî har nêbeno. Girîngî dana herême de îdarekerdişî zî vernîya dîktator û sîyaseto qilêrin gêno.

Tevgera Azadîye nê babetan de cerebeyî kena. Dinya de zî cerebe estê. Fîlozofan zî sîyaset û îqtîdarî ser o çî zaf nuştê. Ganî bêro zanayene, no problem yew problemo gird o. Winî rew nêyeno çareser kerdene. Labelê ganî ma alternatîfan awan bikerê û cerbeyan bikerê. Sewbîna rayîr ma rê şaran rê çin a.

Biweşane
Verê Asmên
BadêNîşane

Cewab verde

Please enter your comment!
Please enter your name here