Wisar ame

Azad Ararat

Wisar ame. Xeyr û silamet ame. Baş o ke ame. Emser ma 9ê çileyî de Sakîna û embazanê aye ard xo vîr. Badê cû 15ê sibate bî. Yanî roja sîyaye. A roje bî hewro sîya ma ser o gêraye. Bi desan kesan xo veşna. Zerrîya ma de dejê bêpeynî dest pêkerdî. 8ê adare şenik bo zî zereyê ma kerd şen. Rewşa Efrînî ver ma ge merdî, ge mendî. Labelê xoverdayîş bêmabên dewam keno. Rew-erey ma do heyfê Efrînî bigîrê. Nê kerdenê kambaxî ne dewleta tirkî rê ne zî yê rûsan rê nêmanenê. Çunke kurdî sey verê nîyê. Jêhatî bîyê. Newroze coşa ma kerde berze. Ma verênanê xo ardî xo vîr. Xora ma ruhê xoverdayîş û hêrsê heyfgirewtişî verênanê xo ra gênê. Welat û teberê welatî de Newroze bi hawayo heybet ameye pîrozkerdiş. Şarê kurdî û dostanê ci yew mesajêko muhîm da. Vatêne: “Rayîrê şorişî rast o û ma pêra yê.” Dişmenî senî kenê wa bikerê, şoriş û şarî bîyê yew. Kes nêşeno zorê înan bibero. Coka, bibo mebo do şarî yanî şoriş serkewo.

4ê nîsane! Yew rojêka rêze nîya. Seba ma kurdan, seba şaran, seba merdimîye, yew roja taybete ya. A roje de tena Rayberê ma maya xo ra nêbî. Ma hemine newe ra bigan û biruh bîyî. Dewleta tirk û îqtîdarê ci wele eştibî ma ser. Gorê ma de ma ameybî beton kerdene. Labelê sey gula ke kemer de aj dana û bena gird; şarê kurdî beton qelişna û rîyê xo vete teber. Bin wela mergî ra cuyêka newe xelqna. A roje, roja 4ê nîsane, seba ma kurdan qasî bîyayîşê roja Îsayî girîng û erjin a. 4ê nîsane, her çiqas dişmenî nêverda dewa Amara de bi heybet bêro pîroz kerdene, labelê şarê ma heme cayan de bi çalakîyanê cîya-cîyayan pîroz kerd û mesajê xo da heme dinya.

Êdî wisar o!

No wisar û sere ra heta peynî na serra 2018î bena serra raverberdişê azadî û edaletî. Winî aseno emser dewleta tirkî bi îqtîdarê xo ya rijîyena. Beno ke peynîya emserî de dewleta tirkî memano zî. Beno ke rewşa dewleta tirkî yê Surîye û Îraqî ra xirabêr bo. Emser do xeylî vurnayîşî bêrê raste. Çîyê ke nika ra nêyenê texmîn kerdene do bêrê raste. Peynîye de şarê ma û merdimîye ser kewenî. Çunke naye ra vêşî kewtiş nêbeno. Hîna zîyadêrî kewtiş, yeno manaya çinbîyayîşî. Qandê cû emser serkewtiş esto. Îqtîdarê ke zulm ramenê şaran ser, do tene bi tene bêrê rijnayîş.

Wisar ame. Gerîlayî kewtê hereketî mîyan. Nika ra çalakîyê ke benê ra aseno ke emser do senî ravêro. Heta 15ê tebaxe ma do gamanê girdî bierzê. Hem hetê şerî ra, hem hetê sîyasetî ra, hem zî hetê dîplomasî ra, çîyê balkêşî do bikewê rojeva ma. Heta serrgêra awanbîyayîşê PKKyî ma do têkoşînê xo xeylî biberê raver û mijdanîyanê neweyan bidê şarê xo. Waye û biratîya şaran hîna vêşî awan bikerê û dewletanê dagîrkeran birijnê.

No wisar bi no hewa beno wisarêko taybet. No wisar beno binyatê xohêzkerdiş û xorêxistinkerdişê şaran. Bi no tewir peynîya zordarî û zulmî yena.

Cewab verde

Please enter your comment!
Please enter your name here