Mamostayêk efrînij

Azad Ararat

Mamosta veng dana vana: “Ax heval vengê mi ame birnayene.” Veng saete 03:51 de ameyo rusnayene. A saeta ke her kes hewn de yo, mamostaye peyam rusnaya. Çend rojî verê bî Whatsapî ser o wina nuştbî. Mamostaya jineologe, Sêvîne. Verê mi yew meqale de qala kênayanê jineologan kerdbî. Sêvîne nînan ra yewe ya. Hetê bawerî ra elewî ya. Şarçeya Mabetan ra ya. Mi yew nuşte de wendbî nê rojanê kambax de. Nuşte de nuştoxî nuştbi û vatbi: “Elewîyê Efrînî Vakurê Kurdîstanî ra ameyê. Wextê xo de zilmê Osmanîyan ver remayê.” Sêvîne torinê nînan a. Sêvîne û se hezarî nika koçberîye de yê. Çi heyf! Ez hêrsan ver zehmetî ancena, seba nuştişê na meqale.

Putîno puşt û Recebê dimbik nê kambaxiyan anê ma ser la ganî ma bêçare nêbê. Xoverdayîş çîyêko tewr pîroz o rojanê wina kambax de. Teslîmkarîye merdimîye ra vejîyayîş a. Qandê cû xoverdayîş zerrn o. Teslîmkarîye merdişê pîs û kewte ya. Ma teslîm nêbenê û xo erzenê ver. Êdî peynîye senîn bena wa biba. Qet derd nîyo.

Sêvîne şewa 17ê adare 2018î de, saete 00:53 de fina wina nuşto, Whatsapî ser o. Ma bîyê koçber. Mîyanê ereban de, cayêk de. Nameyê ci Til Rifat o. Merdiş na rewşe ra holêr o. Rewşe û zehmetîyê cuye qet mi rê derd nîyî, la rewşa hevalan mi kişena. Homa înan hezar rey bisevekno. Ez senîn bo zî her şewe kuçeyanê dewa xo ra gêrena. Ez ci ra nêvejîyena. Hewnê mi uca de ravêrenê.

Çekuya dejî nê kerdenan ver de lal manena. Bêmana bena. Eke ma vajî dişmenê ma har û nêmerdim o. Welle qîm nêkeno. Ez vana mîyanê tarîxî de çiqas zilm û zorvajî bîyê, nînan hemînan bîyarê pêser, peynîye de qasê zilm û zordarîya tirkan nêkeno. Oyo ke tirkî ardo ma ser hende gird û giran o.

Ma bêrî xo ser. Ma kurdî çi halî de yê? No het ra rewşa ma senîn a? Çend rojî verî bî yewo kurdo xayîn televîzyon de îzehet dano. Îzehet de destpêk ra heta roja ewroyî, PKK çi kerdo se heminan ano ziwan la bi metodêko xayînane. Goreyê nê dimbikî ke, dimbika dişmenî weş cineno, seba kurdan çîyêko şenik û basît kerdiş zaf sucêko gird o. Eke sey PKKyî çîyê tarîxî bêrê kerdiş xora heme çî beno mubah. Êyê piştî danê zî PKKyijan ra vêşêr benê sucdar.

Vakurê Kurdîstanî de 70 hezar ra vêşî qoricîyî estê. Êyê ke cayê xo hetê dişmenî de girewtê zî nînan ra tayêr nîyê. Êyê sey Mehmet Metîner, Muhsîn Kizilkaya, Orhan Gîoxlu ûsn. Xora Başûrê Kurdîstanî de destpêk ra nata tay partîyan rasterast dişmenîya Şorişê Rojawanî kerd û kenê zî. Rojhelatê Kurdîstanî de êyê ke mîrasê Doktor Qasimloyî werdî û ameyî Başûrê Kurdîstanî de niştî ro, tayê nînan ti vanê qey sond werdo ke dişmenîya PKKyî bikerê. De bêrê û qehran ver meteqê. Eke halê ma yê neteweyî wina bo ma do senî buglateyanê sey Efrînî nêrê ma ser.

Nê di mengan de çîyo ke ma Efrîn de fam kerd: ganî ma keyeyê xo pak kerê. Verê xo bidî dişmenî. Winî şer bikerê ke wa tarîx mat bimano.

Cewab verde

Please enter your comment!
Please enter your name here