Çala Mergî

Azad Ararat

Dewa Erbîdî ya Silûkî ya Girê Spî ya Rojawanê Kurdîstanî de yew çale esta. Nameyê na çale Hut o. Çal kewena Başûr Rojhelatê Silûkî. Çale Silûk ra new kîlometre dûrî ya.

Nê deştê hîra û bêsere û bêpeynî de na çale senî ameya pê, zehmeto kes ci ra fam kero. Çale hîra û xorîn a. Binê ci de awe esta. Her serre her ke varan vareno çale bena hîra. Labelê çale pirr nêbena. Winî aseno ke çale awe û lincîya herekîna dana binê erdî. Eke winî nêbo çale do lincî reyde biba pirr.

Na çale nika biya namedar. Çirê?

Wexto ke çeteyanê DAIŞî nê cayan dagîr kenê, çale seba kiştişê merdiman bikar anê. Destpêk de leşkerê dewleta Sûrîye ke kewenê destê DAIŞî anê na çale ser û erzenê ci. Badê cû wexto ke kesê çete tepişenê û wazenê bikişê anê na çale ser û kişenê. Labelê kiştişî sey yewbînî nîyê. Bi metodanê tewir bi tewiran merdiman kişenê. Nînan ra:

1-Merdiman bi betanî pîşenê û erzenê çale mîyan.

2-Çimanê tepişteyan pîşenê û anê çale ser. Tepişteyan ra vanê: “Ma şima serbest verdanê. Ver bi aver vazdê.” Eke merdimî vazdayî kewenê çale mîyan û yan benê dirbetin badê mirenê yan zî rasterast mirenê.

3-Veyvik û zamayê şahî virazenê, anê na çale ser û erzenê ci.

4-Tayê kesan zî anê û sere birnenê, badê erzenê çale mîyan.

Badê hîrê serran hîna zî kîştanê çale de gonîye esta. Goreyê vatişan; badê reynayîşê Girê Spî wayîrê kişteyan ameyê û cenazeyê xo na çale ra vetê û berdê mezelan de wedarnayê. Heta verê çend mengan zî çale de cenaze ameyêne dîyene. Seba ke kesî bişê xo verdê çale mîyan, kişta çale de berêk ameya kul kerdene. Tîya de yew pîjiko asin ca kerdîyayo. Bi no tewir kesî xo verdayo çale û cenazeyê xo veto û berdo.

Badê reynayîşê nê cayî ra, kesê xerîbî û şêligê nê cayan yenê tîya ra ewnenê. No ca bîyo îbretî alem.

Ê merdimê ke wayîrê nê kerdenan ê, nika Efrîn de ver bi sîstemê tewr demokratîke û azade de şer kenê. Şarê Kobanî nê çeteyan ra vanê: “Kokê ci tirkî yo.” Kokê nê çeteyan dewleta tirke yo. Menga sibate ra nata kok û gilê na dara sîyaye vera Efrînî de şer kenê. Wazenê Efrîn dagîr bikerê. Na dinyaya globale de çiqas çete û kiştoxê globalî estê, hemine ameyê pêser û gale anê Efrînî ser. Û merdim nê kerdenan ra fam keno; şero ke Efrîn de beno şerê merdimîye û nêmerdimîye yo. Qandê cû hetê Efrînî girewtiş hetê merdimîye girewtiş o. Dûştê Efrînî de vindertiş dûştê merdimîye de vindertiş o. Bêgûman êyê piştî danê nê xoverdayîşî, na dinyaya kambaxe de merdimê tewr rindek û xasek ê. Êyê ke rasterast yan zî nerasterast piştî danê dewleta tirke, gandar ê la merdim nîyê.

Şorişê Rojawanî de fina bîne ame dîyene ke dewletî zaf bihêz ê. Labelê şarî zî zaf bêhêz ê. Şero ke Efrîn de yeno kerdene şaran ano têhet. Xoverdayîş gird beno, la zaf tay o. Bi no halê xo ma nêşenê no sîstemo kambaxe dest ra bireyê. Ma nêşenê sîstemê xo bipawê. Hewcedarî bi yew şorişo girdêr rê esto. Eke şoriş girdêr bî hîrayê Rojhelato Mîyanên û dinya bî; o wext ma eşkenê sîstemê şaran awan kerê û bipawê.

Biweşane
Verê Ez Mirena 
BadêBêkes

Cewab verde

Please enter your comment!
Please enter your name here