Ya Star

Azad Ararat

 

Nê rojan de reyna kurdî rojeva dinya de yê. Ma wazenê bi kultur û tarîxî reyde rojeva dinya de bê. Ma nêwazenê zilm û tehdaya ke ma ser o yena kerdene ya rojeva dinya de bê. Ma nêwazenê rojeva estbîyen yan çinbîyena xo ya rojeva dinya de bimanê. Ka kurdî estê, yan ney? Eşkenê sîstemê xo ronê yan ney? Eşkenê xo îdare bikerê yan ney? Bi na babete rojeve de mendiş heqareto tewr gird o. Ma estê. Ma şarêko bi kok û kan ê. Dinya tarîx de, verênanê ma ra musabî merdimîye. Qandê cû wa kes xo şaş mekero. Kurdî wayîrê qabîlîyeta vurnayîşê dinya yê. Senî beno wa bibo, na dinya do bêra vurnayene. Kurdî do sîstemê xo ronê. Sîstemê azadîwaz û demokratîke senî beno, ma mojnenê nê teresanê alemî rê.

 

Kurdî nê rojan de bi israr, têpey, têfek ra vanê: “Efrîn nêkeweno!” Ya, Efrîn nêkeweno. Efrîn nika ra ser kewto. Ma yê kurdî dewletnetewan ra fam kenê. Ê heta deqa peynî do nêverdê ma ser kewê. La şarî. Ma kurdan rê helwesta şarî zaf girîng a. Ma wazenê şaran xo reyde bivînê. No heqê ma yo. Dost, way û birayê ke wayîrîye şarê kurdî rê kenê, eslê xo de wayîrîye xo rê kenê, estê. Ez minetdarê nînan a. Labelê wa baş bêro zanayene, cehtkerdişê şaran, dost, rêxistinê medenî û roşnvîran; herçiqas ke zaf bi mana bo, çi heyf ke qîmê vindernayîşê nê şerê kambaxe nêkenê. Ma rê piştîdayîşê winî ganî yo ke bieşko nê şerê qilêrinî vinderno. Dewleta tirke ra hesab biperso û dewletanê sere de Rûsya û Almanya ra hesab biwazo. Teverê naye de cehd kerdene, beno ke piştîdayîşêko manevî bo. Eke şarê kurdî ame çin kerdene, manaya nê piştîdayîşî zî nêmanena. Rewşe lezgîn a. Qandê cû ganî çareserî zî lezkanî bo.

 

Hêjayî biewnê!

 

Ez meqaleyanê xo de ge-ge tarîx ra anekdotan dana. Şorişê neolîtîkî, awankerdişê Konfederasyonê Medan, dewrê Selahaddîn Eyûbî: hemine zî seba raver berdişê merdimîye bî. No şaro ke tarîx de wina bî; di sey serrî ra zîyadêrî yo, sîstemê alemî ca nêdano kurdî û her tim wazeno kurdan qirkerdişî ra bivîyarno. Gelo çira? Ma merdimîye hende xo ra dûrî kewta? Ma vajî merdimîye hetkarîya kurdî nêkena. Wa bo. Kurdî xo bi xo, bi îmkananê xo xo rê rayîrêk dîyî. Bi nê rayîrî wazenê xo azad bikerê. Çira no sîstemo kambaxe û rijîyaye; Rayberê nê şarî eşt girawe û waşt uca de çin bikero yan zî teslîm bigîro. Xora 15ê menge de serrgêra na roja tarî ya.

 

Labelê Rayberî heme kefenî dirnayî. Hetê hişî ra yew hazîne arde raste. Kurdî bi fikranê newî û raverî ya newe ra ameyêne xo. Labelê no sîstemo apeymende, her game dewleta tirko sey gayê îspanyolij rameno kurdan ser. Reyna zî na dinyaya kambaxe vera kurdan de neçar û perîşan a.

 

Ey merdimîye yê azadîwaz û demokrasîwaz!

Ez şima rê bi uslubê maya xo vajî: “Ya star. Leh leh leh leh. La bes o bes!”

Şansê ma yê vindîkerdişî çin o. Eke kurdî vindî bikerê, pêroyê merdimîye vindî kena. Bi kilmî nêbeno kurdî vindî bikerê. Ganî se ra se kurdî ser bikewê ke merdimîye merdimbîyayîşî de ser bikewo. Ma naye ra çiyo ke nêro famkerdiş çik o?

 

Biweşane
Verê Efrîn
BadêEvîn

Cewab verde

Please enter your comment!
Please enter your name here